ب ٢٠٢٠
الخطط الحكومية صارت مكشوفة و مؤشرات الأداء صارت بإدين جماعة كرابيج الحلب بلفوا فيها أصابع زينب و هريسه
حزم جديدة و اخر الحزم رح تكون تنزيلات على سيارات تسلا وخصم بوصل ٢٥٪ و اعفاء للمواطنين على ضريبة ساعات الرولكس و سيشهد ايضا تصريحات من وزراء النهضة مسلية جميدنا لا يقل كفاءه عن الكافيار الروسي و خط الفقر الأردني يلامس على خط الفقر السويسري و سياح وادي شعيب يصرفون اكثر من معدلات الصرف في مربيا و البندقية
و لن يخلو عام ٢٠٢٠ من كم فاسد رح ينحبسوا كم شهر و تطلع جاهة تستقبلهم على باب السجن و كأنه محررين القدس
و البنك الدولي سيشيد بالحكومة و حتى لو وصلت المديونية ل ٤٠ مليار دينار بنهاية العام لكن على الاقل المديونية مدروسة و موثقة وواضحة. مش مهم المديونية المهم الإجراءات و الحوكمة.

ب ٢٠٢٠

مجلس النواب اكيد رح يشهد انتخابات مختلفة لانه الناس وعيت و فهمت الصح
٢٠٢٠ عام النواب الصح و لا رح يهمنا قرابة ولا صاحب اذا مش صاحب كلمة و لا رح نسأل عن مناسف ولا ٢٠ ليرة و لا رح نحلف لحد و حتى الاخوان رح يبطلوا يحكوا حصتك محفوظه بالعكس اذا انت كفؤ رح تكون كل الحصة الك
الناس رح تنتخب الي بستاهل مش الي بعين ولادها بالجيش و بمد مي و كهربا لانه الحكومه اصلا رح تكون آمنت الخدمات.
و بآخر شهر تسعة
رح يرجع للاسف نفس الوجوه يمكن
خربطوا بالصناديق و فرزوا صناديق ٢٠١٩.

ب ٢٠٢٠ 

الناس من كثر حلاوة الوطن رح تشتهي مرارة الغربة و ما رح تسمح للرئيس يقنعها ما تهاجر و رح نشوف ولادنا كلهم قتيبة و الي تعلم و ما تعلم رح ينزل عالشارع و ما رح يقدروا يسمعوا نصايح الرجيم من مسؤول مكرش و رح تبطل اغاني اه لو لعبت يا فقر تصبرهم مع سيجارة صباحية و  قهوة عالريحة

ب ٢٠٢٠
الاندية رح ترجع تلعب بدوري المساجد و الريادة الاردنية رح تبطل موضه و يصير فيها بطالة فلا الريادي رح يصبر و لا المستثمر جاي عباله يصرف و يستثمر
الشركات رح تصير حريصة وما رح تصرف لانه السنه الماضية قضت على الحيلة و الفتيلة.

ب ٢٠٢٠
التكنولوجيا و الرقمنة
صراحة وعدت الشباب بانتاج  اني ما احكي الا بقرار مجلس إدارة و انا رح اوفي بوعدي.. التكنولوجيا فل الفل.

ب ٢٠٢٠

اذا ما استلم الناس المخلصين و حملوا البلد و بطلنا نعتمد على المساعدات بكل شي اكيد كلنا رح تأخذنا الحكومة ورا مصنع الكراسي..

[27-12-2019 01:51 PM]